Егда ты, Царю мучениче, от Бого борцев заключен бысть, велию радость с Царицею и чады имел еси, егда служитель Божий посещаше тя, службу Божию совершая. Такова благочестиваго Царя и Помазанника Божия множайшие от народа отвратишеся, яко забыша слово Божие, призывающее почитати Царя, и прииде на вся ны гнев Божий. Сего ради в покаянии зовем: Господи, подаждь страждущей стране Российстей, предстательством Великаго мученика Царя от Бого борцев избавление и возставление Престола православных Царей.

     Воспеваем тя, Царю мучениче, и многострадальный страстотерпче, понеже всех в сердце своем вмещал еси, якоже Павел Апостол, алчущаго насыщая, скорбящаго утешая и страждущему соскорбя, о заблуждающих печалуя, осужденнаго злодея милуя, клевету и неправду кротко снося, о вере и благочестии ревнуя, славу и богатство мира сего ни во что же вменяя, паче же отягощаяся ими, попечение о мире всего мира имея, любовию ко всем пламенея. Приими и нас в сердце твое, о многострадальный Царю и Великий страстотерпче, и моли Милостиваго Бога, да помилует нас, и подаст нам крепость подражатели твои быти.

     Боговенчанная мученице, святая Царице Александро, кто изречет твое воистину евангельское житие? Прешла еси от иноверия к вере православней, юже восприяла еси всем сердцем твоим, возлюбивше молитву, храм и святыя Таинства, еще же поучения святых отец, возрастивше чада твоя во благочестии, и уготовляюще их к мучению за Христа, терпящи кротко клевету забывших Бога, и не разумевающих истиннаго благочестия твоего, сего ради молим тя, моли Христа Бога, Егоже возлюбила еси, да спасет души наша.

     Велия вера твоя, святая мученице Царице Александро, в горцем заточении от бого Борцев бывши, и чающи мученическия смерти, глагола еси сице: да уготовим себе к сретению Небеснаго Жениха, Бог исполняет и озаряет душу мою неизглаголанною радостию и тишиною, душа моя ликует, разумеющи, яко Жених приближается, душа моя трепещет, яко Бог близ есть, да просим у Бога себе и всему миру грехов прощения, помолимся о забывающих молитится и о всех людех. Исходатайствуй, святая мученице, и нам грехов прощение, и велию милость.

     Святый мученик Царевич Алексий, возлюби силу Крестную. Сия вера Крестная поможе ему без роптания прейти страдальческий Крест неизцельнаго недуга чрез всю его маловременную жизнь, и с терпением и упованием прияти мученическую кончину за Христа. И ныне на Небесех молися о нас, верою и любовию совершающих память твою, да подаст и нам Господь веру и терпение и любовь.

     Святые мученицы Христовы, Царевны Ольго, Татиано, Марие и Анастасие, яви вас Христос, яко Ангелы во стране Российстей, бысте бо чистоты, любве и сострадания образ, имже научистеся от благочестивейших родителей своих, любовь велию имуще ко всем, наипаче ко страждущим, имже послужисте, по заповеди Христовой: болен и посетисте Мене, егдаже гонение, заточение и поношение наста, добродетели величайшия Веры, кротости и терпения показасте, воспевающе святыя молитвы, и полагающе надежду на Бога, взывающе ко Господу пред иконы многими, ихже устроитсе у себе, моляся кротко за врагов, неповинно вас терзающих и убивающих. Кротость и терпение ваше сердца злодеев умягчаше. Велия ваша добродетели на земли, велия слава на Небесех, святыя невесты Христовы, молитеся о душах наших

     Неблагодарно едини оставлены, святый Царю наш страстотерпче Николае, святая Царице Александро Новая, небесных же Наследниче отроче Алексие, Царственные девственницы Ольго, Татьяно, Марие и Анастасие, седмерица святая, многими унижении восход обретшии и сострадальцы четыре с собою привлекшие, молитися с ними Всеблагому Богу, да прощения сподобит многопрегрешившия люди российския и спасет души наша.